កន្ទាលត្រអាកជាអ្វី? ហេតុអ្វីក្មេងឡើងកន្ទាលត្រអាក?
កន្ទាលត្រអាកជាអ្វី?
កន្ទាលត្រអាកជាវិបត្តិដែលធ្វើឱ្យស្បែកឡើងបន្ទះដុំៗពណ៌ក្រហមច្រើនពេញខ្លួន ឫ បន្ទះក្រហមតិចតួចលើរាងកាយ។ កុមារអាចឡើងកន្ទាលត្រអាកដោយហេតុផលផ្សេងៗដូចជា៖
- ប្រតិកម្មអាលែកហ្ស៊ីជាមួយចំណីអាហារ ឱសថ ឫ សត្វល្អិតខាំ
- ឆ្លងវីរុស
- អាកាសធាតុត្រជាក់
- ព្រះអាទិត្យ
- ស្ត្រេស
- ការអេះលើស្បែក
- លំហាត់ប្រាណ
- មិនមានមូលហេតុជាក់លាក់។
កន្ទាលត្រអាកអាចខុសគ្នាតិចតួចទៅតាមក្មេងនីមួយៗ។ វាអាចមានរោគសញ្ញាដូចជា៖
- បន្ទះពណ៌ក្រហមស្រាលលើស្បែក
- ពណ៌សស្ដើងនៅកណ្ដាលស្បែក
- ស្នាមក្រហមដិតតូចៗ ឫ ធំប៉ិនបាតដៃ
- ងាយផ្លាស់ប្ដូរទីតាំង (ឧ.ចាប់ផ្ដើមកើតនៅមុខរួចរាលទៅដៃ)
- រមាស់ ឈឺ និងឡើងរលាក។
តើការឡើងកន្ទាលត្រអាកអាចមានរយៈពេលប៉ុន្មានថ្ងៃ?
វាអាចនឹងមានរយៈពេលប៉ុន្មាននាទី ប៉ុន្មានម៉ោង និងជាច្រើនថ្ងៃទៅតាមលក្ខខណ្ឌសុខភាពនីមួយ។
កន្ទាលត្រអាកអាចនឹងជាបាត់ទៅវិញដោយឯកឯង តែក្នុងករណីអ្នកនាំកូនទៅជួបគ្រូពេទ្យជំនាញ គាត់អាចនឹងចេញថ្នាំប្រភេទ Antihistamine ដើម្បីកាត់បន្ថយកន្ទាលត្រអាកនិងអាការៈរមាស់។
តើការឡើងកន្ទាលត្រអាកអាចឈានដល់ការចូលសង្រ្កោះបន្ទាន់ទេ?
កន្ទាលត្រអាកក៏អាចជារោគសញ្ញានៃប្រតិកម្មអាលែកហ្ស៊ីធ្ងន់ធ្ងរដែរ ដែលយើងហៅជាភាសាពេទ្យថា anaphylaxis ។ វាធ្វើឱ្យក្មេងពិបាកដកដង្ហើម និងប៉ះពាល់ដល់សរីរាង្គកាយផ្សេងៗ។ ប្រសិនជាមានវិបត្តិនេះកើតឡើង សូមប្រញាប់់នាំកុមារទៅពេទ្យជាបន្ទាន់។
តើវាអាចការពារបានទេ?
កុមារដែលធ្លាប់កើតកន្ទាលត្រអាកពីមុន ហើយដឹងថាការឡើងកន្ទាលត្រអាកមកពីមូលហេតុអ្វីនោះ អាណាព្យាបាលអាចការពារតាមរយៈបញ្ចៀសវត្ថុ/អាហារដែលនាំឱ្យកើតកន្ទាលត្រអាកនោះ។
ប្រភព៖
- ឱសថការីឧត្តម ហាក់ ស្រីរ័ត្ន - ជាអ្នកជំនាញខាងផ្នែកអាហារូបត្ថម្ភ និងសុខភាពកុមារប្រចាំឱ្យក្រុមហ៊ុនទឹកដោះគោម្សៅ NutriGold
- បានបញ្ចប់ការសិក្សាពីសាកលវិទ្យាល័យអន្តរជាតិ ផ្នែកឱសថសាស្ត្រ និងមានបទពិសោធន៍ក្នុងផ្នែកសុខាភិបាលអស់រយៈពេលជាច្រើនឆ្នាំ
