មានអ្វីកើតឡើង ករណីអ្នកមិនបានសម្អាតធ្មេញទឹកដោះរបស់ក្មេងជារៀងរាល់ថ្ងៃ
ធ្មេញកំណើត ឫ ធ្មេញទឹកដោះ ចាប់ផ្ដើមកកើតតាំងនៅក្នុងពោះម្ដាយចាប់តាំងពីត្រីមាសទី២។ មុនទារកកើត ធ្មេញទាំង២០របស់ទារកមានរួចស្រាប់គ្រាន់តែវាមិនទាន់ដុះចេញមកខាងក្រៅ។ ធ្មេញស្រុក សំដៅលើធ្មេញទាំង៣២របស់មនុស្សទូទៅ។
ការលូតលាស់នីមួយៗរបស់ទារកតូចៗ ចាប់ផ្ដើមពីការចេះញញឹមដំបូងទៅជាការដុះធ្មេញដំបូងគឺពិតជាគួរឱ្យរំភើបជាខ្លាំង។ នៅពេញធ្មេញទី១ចាប់ផ្ដើមដុះ អាណាព្យាបាលគួរចាប់ផ្ដើមធ្វើការថែទាំធ្មេញទារកឱ្យបានត្រឹមត្រូវ។
ហេតុអ្វីធ្មេញទឹកដោះទារកត្រូវការការថែទាំខ្លាំង?
ធ្មេញទឹកដោះ ឫ ធ្មេញព្រៃចាប់ផ្ដើមដុះនៅពេលទារកអាយុ៦ខែ។ ត្រឹមអាយុ៣ឆ្នាំ កុមារដុះធ្មេញទឹកដោះទាំងអស់រួចរាល់ ហើយធ្មេញទឹកដោះនេះចាប់ផ្ដើមបាក់នៅអាយុចន្លោះ៥ ទៅ ៦ឆ្នាំរហូតដល់១៣ឆ្នាំដើម្បីដុះចេញវិញនៅធ្មេញស្រុក។
ធ្មេញទឹកដោះមានចន្លោះសម្រាប់ធ្មេញស្រុកលូត ហើយវាក៏ផ្សារភ្ជាប់ជាមួយសុខភាពទារកដែរ។ ធ្មេញពុក ឫ ប្រហោងធ្មេញទឹកដោះអាចបង្កឱ្យមានពុកធ្មេញ ឫ ប្រហោងធ្មេញស្រុក។ ធ្មេញទឹកដោះនេះក៏ជួយកំណត់លើទម្រង់មុខរបស់ក្មេង ការលូតលាស់លើការនិយាយ និងការទំពារដើម្បីទទួលបានអាហារូបត្ថម្ភត្រឹមត្រូវ។
ផលប៉ះពាល់ករណីអ្នកសម្អាតធ្មេញទឹកដោះ ឫ ធ្មេញព្រៃរបស់កុមារមិនបានត្រឹមត្រូវ
ក្នុងករណីដែលកុមារមិនសម្អាតធ្មេញបានត្រឹមត្រូវ ក្មេងងាយប្រឈមនឹង៖
- ងាយនឹងប្រឈមនឹងដង្កូវស៊ីធ្មេញឫប្រហោងធ្មេញ
- ងាយឈឺធ្មេញ
- ពិបាកទំពារអាហារ
- ក្លិនមាត់មិនល្អ
- និយាយមិនសូវច្បាស់
- ប៉ះពាល់ដល់ធ្មេញស្រុក។
សូមសម្អាតធ្មេញក្មេងឱ្យបានត្រឹមត្រូវ
- បង្រៀនក្មេងដុសសម្អាតធ្មេញ៖ មួយថ្ងៃដុសពីរដង និងបង្រៀនពីវិធីដុសសម្អាតឱ្យបានត្រឹមត្រូវ និងគ្រប់ក្រឡុកក្រលាតនៃធ្មេញ
- បង្កើតភាពសប្បាយ៖ ចាក់ចម្រៀង ឫ និទានរឿងដែលក្មេងចូលចិត្តអំឡុងពេលដុសធ្មេញ
- មានរង្វាន់៖ ក្នុងពេលដែលក្មេងដុសសម្អាតបានត្រឹមត្រូវ និងអាចដុសដោយខ្លួនឯងបាន។
ជ្រើសរើសផលិតផលថែទាំធ្មេញក្មេងឱ្យបានត្រឹមត្រូវ
- ជ្រើសរើសផលិតផលដែលត្រូវនឹងវ័យរបស់កុមារ
- ជ្រើសរើសផលិតផលដែលជួយការពារពុកធ្មេញ
- ជ្រើសរើសច្រាស់ដុសធ្មេញដែលមានសរសៃទន់ និងរូបរាងទាក់ទាញចិត្តក្មេង
តិចនិកសំខាន់ៗសម្រាប់អនាម័យមាត់ធ្មេញ
- ដុសធ្មេញរយៈពេលប្រមាណ២នាទី មួយថ្ងៃពីរដង
- ប្រើថ្នាំដុសធ្មេញដែលមានជាតិហ្លុយអររ៉ាយ និងជាផលិតផលដែលត្រូវវ័យកុមារ
- តាមដានការញ៉ាំរបស់ផ្អែមៗលើកុមារ។
ប្រភព៖
- ឱសថការីឧត្តម ហាក់ ស្រីរ័ត្ន - ជាអ្នកជំនាញខាងផ្នែកអាហារូបត្ថម្ភ និងសុខភាពកុមារប្រចាំឱ្យក្រុមហ៊ុនទឹកដោះគោម្សៅ NutriGold
- បានបញ្ចប់ការសិក្សាពីសាកលវិទ្យាល័យអន្តរជាតិ ផ្នែកឱសថសាស្ត្រ និងមានបទពិសោធន៍ក្នុងផ្នែកសុខាភិបាលអស់រយៈពេលជាច្រើនឆ្នាំ
